Ča je život vengo fantažija

To je bilo ka’ u priči,
Roko nije jema ništa,
Ćićibela još i manje.
Ali jubav sve izliči,
on je bija anarkista
jemali su i kumpanje.

To je bilo ka’ u priči,
puno jutih i friskine,
ma je isto priča prava.
Čulo se i grubi riči,
bumbilo se puno vina,
bolila je dikod glava.

To je bilo ka’ u priči,
živili su ka’ golubi
i nosili svoje brime.
S puno srca, s malo riči,
goli, bosi, gladni, grubi
volili se cilo vrime.

To je bilo ka’ u priči,
kad su bili puno idni
bombe, rašpe, livorvere.
I još druge strašne riči
vikali su oni bidni,
ma su prošle te nevere.

To je bilo ka’ u priči,
malo sriće, puno jada
puno zime i propuva.
Ali jubav sve izliči,
boje vengo sto balada,
boje vengo štruca kruva.

To je bilo ka’ u priči,
ma ih više ovod nima
na dnu mora su gajete.
Sve beštimje, grube riči,
sve je prošlo poput dima
vrime metlon sve pomete.